Самуэль Асінскі

Самуэль Асінскі
Герб «Радван»
3-і Вялікі абозны літоўскі 1645 — 1649
Папярэднік	Павел Ян Сапега
Пераемнік	Тамаш Казімір Сапега
Смерць	1649(1649)
Род	Асінскія
Бацька	Павел Асінскі
Жонка	Гертруда Уршуля фон Людзінггаўзен Вольф[d]
Веравызнанне	кальвінізм

Самуэль Асінскі (? — 1649) — дзяржаўны і ваенны дзеяч Вялікага Княства Літоўскага.

Біяграфія

З шляхецкага роду герба «Радван», сын Паўла Асінскага, скарбніка ашмянскага і каралеўскага двараніна.

Вызнаваў кальвінізм. У 1632 удзельнічаў у абранні караля польскага і вялікага князя літоўскага Уладзіслава IV. Пачаў службу ў каралеўскай гвардыі і ўдзельнічаў у вайне Расіі з Рэччу Паспалітай 1632—1634. З 1640 оберштэр першага рэгімента каралеўскай гвардыі. Падчашы ашмянскі ў 1635—1643, цівун бяржанскі ў 1642—1643, вялікі абозны літоўскі з 1645.

У 1645 удзельнічаў у перадачы Расіі горада Трубчэўск (Трубецк). Перадача горада выклікала ў Вялікім Княстве Літоўскім гучны пратэст, Літоўскі Трыбунал прысудзіў Асінскага разам з мсціслаўскім ваяводам Мікалаем Абрамовічам да выплаты 600 тысяч злотых і смяротнага пакарання, але кароль абараніў іх.

У 1646 па даручэнні караля вёў прыгатаванні да вайны з Турцыяй, збіраў атрад жаўнераў. З 1648 удзельнічаў удзельнічаў у баявых дзеяннях супраць украінскіх казакаў. Вызначыўся ў бітвах пад Старым Канстанцінавам і Піляўцамі.

На сойме 1648 выступіў з рэляцыяй пра ход ваенных дзеянняў. У 1648 удзельнічаў у абранні караля польскага і вялікага князя літоўскага Яна II Казіміра.

Меў маёнткі ў розных паветах Вялікага Княства Літоўскага, з 1633 трымаў маёнтак Пароссе (да 1637) і Навіны ў Аліцкай эканоміі, у 1641 атрымаў Берасцейскую эканомію пад умовай утрымання атрада ў 500 чалавек пешай гвардыі і выплаты 5 тысяч злотых штогод каралю.

Літаратура

• Пазднякоў В. Асінскі Самуэль // Вялікае княства Літоўскае: Энцыклапедыя. У 3 т. / Рэдкал.: Т. У. Бялова (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2010. — Т. 3: Дадатак. А — Я. — С. 42. — 696 с. — ISBN 978-985-11-0487-7 (т. 3), ISBN 985-11-0315-2.